工作態度

2007-07-19 日記

如果日日都講我每日去讀書，咁真係悶死人。

今次講下公司遇到既事情。我部門請左個文員，聽人講好似係中五學歷，返左個幾月工，試用期都未過，遲到左3-4 次，請左幾日病假，做野時又唔正經，成日嘻皮笑臉，整整下無返工又唔打電話告假，要人地打羅咁搵佢，非常不負責任。結果人事部打比佢，佢同人事部講話想唔做，唔鐘意做呢個部門，想轉部門。人地當然唔理佢啦。

結果當然唔係人地炒佢就佢自己走人啦。最搞笑係自己唔識寫離職信，要呀叔幫佢寫。未過probation 走只係一星期通知。呢個人連最後一星期都無返過工。

呢個係我見咁多新入職既同事裏面最差既一個。我覺得如果咁既工作態度，去到邊度做都係一樣。我發覺宜家d 初出黎做野既人有好多都好不負責任，連最基本既工作態度都達到唔到，唔怪得知d 招聘廣告咁強調要有責任心啦。