新工作，新里程

2007-08-19 日記

尋日同呀爺呀嘛飲茶，同佢講左mandy 會黎公司做，雖然人工低d ，但係可以學到好多野，我覺得有時細公司比大公司仲學得多d 野，因為細公司一定少人，所以乜野都要做，但大公司就人工高d ，但分工分得多，所以學既野有限，當然大公司會做大公司先有既工作，例如大型證卷行會做配股，大投資銀行會做保薦人; 大型會計師行會幫公司搞上市，呢類工作當然要大行先做到。

下午係度諗今日買咩股票，雖然知道今日一定會高開，但係都唔驚，因為我係一個長線投資者。之前日記都講過，玖龍紙業，中交建，中國神華都會係我既選擇。渣打就肯定會買多一手，因為現價真係吸引。我要沽出一手宏利金融先夠錢買入呢類高增長公司。宜家d 成份股已經去到超買區，黎一個反彈係有可能，但係我覺得政府注資入金融體系係治標唔治本既做法，佢地一定要檢討返佢地既貸款制度，對次級按揭加以收緊，不過我相信歷史會再重現。

夜晚睇阿仙奴對布力般，呢場無上次對富咸咁好睇，列文又一次犯錯，咁樣比人迫和一比一，真係唔抵。阿仙奴新買個個右閘真係幾勁，佢同依保爾差唔多類型。知道曼聯輸波，真係開心，三場得兩分，朗尼又傷，短期都無運行啦。