遲來的春茗

2008-03-07 日記

呢輪好懶，好少寫日記，要寫返。上星期五係公司春茗，聽起黎都搞笑，年都過哂先黎搞，都係志在有個活動姐，又唔洗錢 (唔學似永隆要人比錢)，放工成team 人打的過去皇室堡間迎囍大酒樓，我個team 四個人岩岩夠腳開枱，淨係得我一個人坐黎度，我睇睇下真係好悶，落左去行街，行下”宜家家私”，都係得個行字，無野買到，行下書局睇下書，好快返返去，個時係七點半，以為八時開席，原來係八時半，好彩唔餓，返到去我上司比左個鬼佬打牌，連鬼佬都識打，真係未見過，我就企係度睇，企係我隔離有個鬼妹，我撩下佢傾計，識下人同順便練返下d 英文，結果我都識左一兩個人，入席除左自己個team仲有dealing room d人一齊坐，又識多左人，傾下計咁，大家都係年青人，係NAB 唔係太多廿幾歲既後生仔女，個個都好老餅。

食既野都係平時我地去飲個d ，乳豬呀魚翅呀咁，可惜我唔可以好好享受食物，因為我既痱痴實在太痛，我都唔想多食野。到抽獎時間，差唔多個個都會有獎，最cheap 係50蚊百佳卷，之後100蚊百佳卷各20名，之後係100蚊現金，好似係40 個，之後係500 蚊四位，大獎係1000蚊一位，我個枱係全場最好彩，十二個人有十一個人有獎，1000 同500都係我個枱，除左我個上司無獎，我就抽到100蚊現金，真係好。個個都好開心，氣氛唔錯。

走時我另外一個上司”助理經理”又係住沙田，佢車埋我同呢個兩個同事返沙田，車費都慳埋，真係又食又拎。平時因為多野做，都無咩時間同機會同d 同事傾下計，呢d 機會就係可以比大家聯誼下，識人做野都方便d。