兩隻"落湯雞"

2008-04-19 日記

尋日打哂3 號風，我四點鐘走左去屯門市中心等mandy，行下吉之島，想買模型砌下，但只係得高達，無個d 飛機坦克車。無端端想砌模型係因為呢個係兒時興趣，二來宜家實在生活太無聊，成個"退"廢青年咁，每日睇電視同打winning，雖然砌模型都係同打機無咩分別，但都想有另外一d 野做下。

好衰唔衰，落鬼死咁大雨時先走出去，mandy 又無拎雨傘，兩個人一把傘，係咁橫風橫雨下唔濕就奇，連我對波鞋都入左水，真係離譜。頂唔順要返轉頭，結果無功而還，得來既就只有兩隻"落湯雞"。mandy 買左個雨傘，食完野返屋企時又無雨啦喎，新傘無用無之地。揀正黑雨時先走左出去，真係黑仔。