又去試機

2007-09-24 日記

一早去左旺角試機，本來約左九點半到，結果十點先上到去，諗住IT 個邊已經整好哂個場，set 好哂比我試，結果試落又係好多問題，因為老細要我只係試一個上午，所以佢地搞得黎都唔洗試，試左好少就要走，第二日又要去過。

星期一個大市又黎發瘋，升左七百點，港交所 (388) 越升越有，去到二百蚊，市場期望國慶後直通車會開。但係我發覺雖然大市升，但係成份股中都係一半一半升，大戶有心做某幾隻上去，因為期指結算又到，要頂住個市。背後可能已經沽左好多張十月期指啦。玖龍紙業 (2689)上星期四五兩日加埋跌左十幾個 %，星期一升返2%，宜家廿三個幾，本來係機會買入，但係我估計大市係十月將會回落，到時可能會進一步下跌，所以暫時都係睇住先。宜家個市係唔適宜買股票，我都打算減持我手上既股票，等回落時又有彈藥出擊。