大意

2007-09-13 日記

前日，呀媽諗住用atm 轉錢落去支票戶口，想開支票抽新股。點知佢自己唔為意，禁左提款都唔知，結果禁左4000 蚊出黎無拎到就走左。過左一陣先發現，但係錢已經無左，個刻唔知有無人拎到定係d 錢過十秒自己食返入去。

尋日銀行打比佢話佢聽d 錢無食返入去既記錄，咁即係比人拎左，大拿拿四千蚊，更係唔開心啦。佢話我知，現場有兩部atm，當時佢用緊一部，另外有個女人用緊第二部，現場有兩個出口，一個出街，一個入銀行裏面，當時佢話好靜，無人等緊，佢出去時無人即刻入黎，佢禁左錢時仲搞下手袋，又用左幾秒，咁即係大約十秒八秒內比人拎左，我估有兩個可能，一係銀行入面有人走黎拎錢，一係隔離個女人拎左，我覺得係後者可能性大，如果銀行番睇返閉路電視，就會知道係咪個個女人拎，我呀媽問過銀行可唔可以咁做，佢話要有警察手令先可以，咁我叫呀媽今日去警局報案。如果真係個個女人拎左，咁就易搞好多，但如果係街外人，咁就無架啦。

Mandy 想tum 返我呀媽，想約佢尋晚一齊出黎食飯，但係佢要學游水所以唔得閒。唔知今日呀媽有無去到警局﹖有新進展我會再報告。