上腦

2007-09-29 日記

尋日兩點半先訓，但係八點鐘已經醒左。但係果時既感覺係好似無訓過咁，個頭有小小唔舒服。心水不寧既原因係我成日個心諗住隻輪，波幅大，個心好唔安落，又係度諗可唔可以買輪代替買中人壽正股，因為宜家佢要四萬幾蚊手，唔夠錢買。 個心又係度諗左好多strategy 去買輪，簡直係投資到上哂腦，人地打online game 上腦，我就買股票上腦，無時無刻都諗住，連訓覺都唔安落，真係好怪。

尋日搭車，睇到人地份報紙，原來東亞銀行 (23) 係呢季表現差唔多最差既股份，雖然我放左，但係如果我將呢舊錢買左其他中資股，我個回報會好d 。我唔知今次係咪買錯，我淨係知道宜家我要蝕錢離場，呢隻係計宏富 (808) 之後第二個蝕錢既投資，好彩呢次只係蝕六百幾蚊，我會用呢舊錢再從身投資。

尋日上堂，同d 同學熟左，同我交換左電話，佢show 比我睇佢電話幅相係佢個仔，嘩……..睇唔出個同學咁大個，頂多同我差唔多年紀。放學又咁岩同第二個同學一齊走，大家傾起計黎，佢話我問呀sir d 問題問得幾好，當然啦，呢d 呀sir 全部都係cfa，當然要跟佢地學野啦，我問既問題通常都係問書本以外既問題，問佢地既睇法，佢地諗既野又會唔同，可以學到野。個同學問我畢左業幾耐，我話三年，佢話佢畢左業已經八年，嘩……….咪成差唔多三十﹖個樣同我差唔多，都唔知係我老定人地後生。佢又比左卡片我，又話可以一齊溫書，都好既，大家照應下囉。