對股市既睇法

2007-10-23 日記

宜家股票市場真係大上大落，前日先跌左一千點，尋日即刻升返一千點，去返二萬九千幾點，真係誇張。尋日再放一手中交建 (1800)，賣出價 22.40，賺左7800 蚊，宜家得返一手，宜家手頭上都未試過有咁多現金係個銀行戶口度，我估宜家個現金比率應該有15%，準備下一次既調整，宜家個市真係好強，跌一千點d 人唔會識驚，第二日又可以買返上去，唔通真係唔會跌﹖雖然銀行資金多，外資又多，QDII 基金又紛紛出台，理論上係可以夠哂彈藥頂住個市，但係係咪真係人人都拎哂d 錢出黎買股票﹖如果係既就死啦。資金自由行遲遲未出台，唔係未傾好，而係中央唔敢放水落黎住，如果宜家放水，宜家個市風險咁高，水再多就會爆升，大調整既機會大增，調時中港兩地大家一齊死，所以宜家中央等緊香港跌，佢就會以救世主身份救市，到時中國內地又可以買平貨，香港又可以再升，一舉兩得。

宜家講真，個市已經唔可以用基本分析去睇，因為市場係由一班唔理性既投資者組成，佢地可以將股價推到好高，因為佢地相信個市係唔會跌。十月有三次個市係想跌，但係跌左千幾點又推返上去，我覺得就好似宜家呢個情況。宜家係政策市，由中央話事，所以只可以估佢有咩政策可能會出台，連巴非特都話自己過早沽哂d 中石油啦，因為佢係睇估值，宜家大部份好股票都好貴，跟本買唔落手。

雖然短期風險好高，宜家買股好似接火棒咁，但係我依然長線睇好，因為中國經濟真係發展得好快，有祖國既照顧，真係學呀賭王話 “想衰都難”。所以我宜家都仲有好多貨係手，大部份都買左一段時間，就算跌四千點我都有錢賺。如果宜家大跌，我反而仲高興。

觀察中既股票

1. 中國人壽 (2628)
2. 中國神華 (1088)
3. 蒙牛乳業 (2319)
4. 玖龍紙業 (2689)