07 年回顧

2008-01-03 日記

宜家個生活好無聊，無書好讀，終日放工係屋企無所事事，真係唔知點算。08 年既打算係點﹖真係唔知……….再考多次CFA﹖雖然成績未出，但係我知道99.9%機會我會唔合格，因為我無付出我最大既努力。再搵工﹖呢樣一定要既……但係以前send 既工連interview 既機會都無，真係好心灰。呢輪d 股票唔係好得，投資失利，搞到都無咩心機。為有係屋企打機做個頹廢青年，打返十年前既遊戲 ”信長之野望 – 烈風傳”。宜家既我無哂鬥志。

係金融界最高級既考試CFA 我都考過，不過考唔到，如果唔再考，我真係諗唔到有咩野可以再進修。但係又唔可能08 年就咁就過，一d 努力都無出過。唔通我真係要考到為至﹖

回想07 年，雖然我未至於好努力，但至少都拎到個衍生工具同人壽保險資格，叫做得到一d 野。至於事業上，無任何氣息，因為我做唔好呢份工，我做唔到敬業樂業，我做野無heart，因為我唔鐘意呢份工。試過搵過d 工，去過敦沛見工，因為人工唔滿意，福利又唔夠宜家好，所以無去做，宜家諗起都有d 後悔，因為至少可以踏進證券界第一步，為何當初咁短視。創興銀行又試過搵我去見工，份工都唔知咩黎，又厭人地銀行size細，所以連去都無去，除左呢兩個，其他都無機會interview，試過經人力資源公司搵，見過兩間，見完就算，完全無回音，真係好廢。

同mandy 一齊已經5 年，呢年有突破性既發展，因為佢終於肯黎同我呀媽食餐飯，佢今年大學畢業，呀爺問我mandy 肯唔肯過黎公司度做，mandy 又肯喎，咁我呀媽都係公司做，所以日日都見就自然熟絡。宜家呀媽當正mandy自己人一樣，又成日叫佢黎食飯，又買手袋送比佢，對佢都算唔錯。我最想就係見到呢個情況，我地既感情可以再進一步。

07 年既投資都算唔錯，真正賺既賺左30000蚊，由於又出又入，我都唔知點計個實際年回報率。年尾十一月中至十二月尾，我加大個投資額度，呢兩個月我又投放返接近19 萬落去股票市場度，但由於外圍因素及內地政策影響，到目前為至呢次投資錄到萬幾蚊既帳面捐失。但我相信08 年投資氣氛依然樂觀，整體亦會錄得正增長。

總結而然，07 年都算係順利過渡，08 年既前路好迷茫，特別係事業方面，我相信我要係呢方面諗一諗清楚應該點做。