睇賀歲杯 2008

2008-02-10 日記

初四同凱風去左大球場睇賀歲杯，原本一開始問任仔去唔去，初初都話去，但後尾又話星期日要休息，第二日要返工之類既籍口拒絕，之後我問我細佬去唔去，佢話諗下先，仲講左一d 令我覺得佢唔去既說話 (講咩唔記得)，之後我問下凱風去唔去，佢就即刻好開心咁應承，到出發個日，細佬換哂衫，我以為佢同佢d 同學去睇，點知原來佢以為同我，我話我約左人，佢有惱同失望，走左返入房，可能之前有多少誤會，搞到宜家咁。

但都無辦法，凱風已經搭緊680，我去join 佢架車。去到大球場都係兩點半，好耐無入過現場睇波，之前個次都唔記得左幾時。我地坐係東邊看台，岩岩中間，又唔係好高，其實個位置都幾正。今次係永隆銀行sponsor，所以有兩張免費飛睇。頭場係季軍戰，烏拉圭隊對南韓既球隊，結果係一比一打和，烏拉圭隊以十二碼勝出。

決賽由港聯對克羅地亞既夏德，好似話佢係克國既班霸，有咁上下實力，睇落佢地既頭頂技術真係幾好，但速度就唔係好快，我都擔心港隊嬴唔到冠軍。決賽多返d 人黎睇，超過一萬人，個場既氣氛都唔錯，用哂打氣棒去打氣。結果港隊以二比一嬴左，十五年後再次嬴出。港聯真係幾勁，d 外緩真係好有質素，我相信係近年最強既港聯。大家都好投入個比賽氣氛，現場睇真係好正，可能下年我會再入場支持港隊。

睇完波去左駱克道街市食飯，間野整得好差，差到都唔想再提。走時去左ok買左兩包薯片想tum 返細佬。天氣真係好凍，我又唔係咁舒服，所以好快就搭車各自歸家。返到屋企問呀媽，原來細佬都同佢d 同學睇波，我個心都無咁唔安落。