做細係咁架啦!!!

2008-02-26 日記

自從轉左工之後就少左寫日記，因為工作真係比以前忙碌。我宜家既工作量係係永隆時既兩倍，我自知做野唔夠熟，做得慢，所以早三個字返公司開工，但都做到無停手，同事有同事係度傾計，我有我埋頭工作，比人感覺好似好離群，唔出聲咁，我做野就係咁既態度。最好你就比多d 野我做，我先可以學到多d 野，係永隆時我係主任，可以點人做野，宜家係NAB 係做文員，比人點返轉頭，做左跑腿，感覺真係不是味兒，但係無計，你係乜都唔識，就要聽人講。我宜家只係想盡快學多d 野，呢個亦係我轉工既最主要原因。宜家做既野真係要打醒十二分精神先得，所有既deal 既金額都好大，mil mil 聲，做錯左就算賠一日息都死。

呢個星期我食十二點lunch，連續兩日都去左”新利民”食飯。食返我以前食開既飯，例如白汁雞皇飯，中式牛柳等等。我想問個老闆娘仲認唔認得我，但結果我都無咁做到。

尋日我send 左個e-mail 比我係dean close school 時教我電腦個個呀sir，我話我細佬想入黎讀書，問佢仲有無位。我自覺我算係遲搵學校，好多學校回覆我都話無哂位。如果細佬今年個會考考唔掂，分分鐘無書讀，今次真係大獲!!!!!