放假

2007-07-30 日記

尋日成日都無咩心情做野，因為下星期開始放大假，連埋星期六日共十二日。決定同mandy 去澳門旅行，我去過澳門不下十幾次，但係因為我遲遲無搞個回鄉證同特區護照，得張id card 淨係可以去澳門。今次唔想住得太貴，留返d 錢傍身。黎緊八月要交cfa 考試費，成差唔多七千蚊，真係好貴。我個朋友steve 最近去過澳門，食左好多地道野，我最感興趣既係魚翅麵，好似三十蚊左右，係真既魚翅。係澳門食魚翅真係好平，以前同屋企人去食，唔洗一千蚊一大煲，六個人食每人5-6 腕，淨係食翅都飽。講緊係七年前，宜家我諗貴左好多啦。

除左就黎放假個心散左，仲有就係成日睇住個股票市場。成日係度掙扎入唔入多一手渣打銀行 (2888) 好。見佢個價跌到去251 蚊支持位，rsi 去到40，由高位跌左20 蚊。跌破50天平均線，係差唔多到我既目標價，但係如果rsi 跌到30 ，就真係最perfect。2888 從來都唔係散戶喜愛，因為炒唔到，股價大，所以買入既人多數都係諗住長線投資，跌20 蚊對佢黎講算係幾多下。結果都係無買到，諗住等多一陣。

返到屋企，知道匯控 (5) 中期業績好過預期，亞洲市場增長強勁，對主力投資亞洲市場既渣打黎講一定有正面作用，話唔定佢既業績都會好好。所以決定今日入多一手。買唔買到﹖咩價位﹖今晚再講。