交收

2007-08-22 日記

尋日無咩野打，得270 份電匯，真係近期最少既一日。六點半唔洗就走左，但係未返屋企住，因為要交收，本來有三個要交收，兩個要比錢幫佢買貨，一個就收錢，點知得返兩個，收錢個個又放飛機，收佢個 36 蚊都要交收，有無搞錯，結果我同mandy 決定唔做佢生意。另外我地要幫個兩個人買貨，咁又比左三百幾蚊。如果唔用我建議既會計方式入帳，就真係回本無期。做呢門生意真係唔容易，至少一定要好有耐性，試過一次交收，係大客黎，幫我地買二百幾三百幾蚊貨，我結果企係地鐵站等足一個鐘三個字，真係累死。為左賺錢，等下都無辦法。我估其他人已經唔等走左啦。但係我就係一個好有耐性既人，所以上次我係澳門等七個鐘都唔覺得d 咩。

Mandy 話想開多一門生意，同佢朋友合作，我叫佢預埋我，但係佢唔比，因為佢地覺得我會唔做野，諗真……..我真係無咩時間再去成日交收，回e-mail，mandy 話如果入貨錢太多先預我啦，少少地就佢地自己搞掂。

夜晚無睇”歲月風雲”，個個時間睇左Mr. Bean’s Holiday，係戲院睇左，幾搞笑，再睇，睇到十一點半。細佬又走埋黎，我就教下佢cfa d 野，介紹下比佢聽啦，唔會expect 佢記得。自己又一路講一路當溫習。又幫佢搵返個UK School League，睇下邊間中學好，細佬讀完會考就會去英國讀書，我相信佢會叻過我。