市況分析及入市策略分享

2007-11-12 日記

恆生指數 – 27665.73 跌 1117.68 3.88% 成交 1400 億

今日一如所料大跌1000 點，跌到27600 點左右，星期日既計劃本來今日會入市，但係諗諗下，我估大市仲會繼續跌，一個真正調整起嘛跌到100 天平均線先似樣，即係 25000 點，如果係真既，仲要跌多2700 點，都咪話唔驚。但係我希望係27000 點會有支持，即係 50 天平均線，所以我估最少都跌到27000 點，仲有700 點水位。今日計返要用幾多錢先可以買哂我既購物名單，原來6萬蚊唔夠，所以今日早上沽埋隻玖龍紙業 (2689) @ 21.40，鎖定利潤賺 5100 蚊，套現21000 蚊，宜家手上有現金 8 萬，計過夠買哂d 心頭嗜。

我覺得宜家未係入市時機，壞消息出現既機會大過好消息，美國未來既數據睇黎都唔方好，中國又有宏調陰影，強日元又令基金拆倉加劇，好彩既係銀行同業拆息仲係處低水平，跌市成交又唔太大，因此未見資金大量流出香港，資金成本小令到本港有機會再減息，加上美國睇黎又要減息去嘗試刺激經濟，呢d 都係所為既好消息。但係長線睇黎弱美元同減息政策只會令美國更加差，人民幣升值唔會對美國既trade deficit 有幫助，美國樓市只會繼續皮弱，睇黎次按真係令到美國經濟幾傷。上証A 股由6000 點跌到宜家 5000 點，係兩個大國既拖累下香港又點會唔跌。宏調對我黎講長線唔係一個壞消息，因為中央只係想大市降一降溫，中國既 CPI 去到6%，主要係食品價格上升，呢樣咁影響民生既野點可以唔阻止，工資追唔上通脹，d 人有幾慘可以係人踩人事件感受到。宏調可以令中國既黃金時代更長久，中央宜家個資本控制政策係聰明既，我相信中國既牛市可以維持最少五年。

我既入市策略係當跌到27000 點就開始慢慢入市，越跌越買。我無可能撈到最低，所以為有分段入市。我既購買清單有以下呢幾隻股份:

1. 中國人壽 2628 1 手
2. 中國神華 1088 1 手
3. 建行 939 1 手
4. 工行 1398 1 手

我有一個心思，就係襯申銀萬國 (218) 因直通車延遲而股價打回原形時買入，博年尾或下年首季正式開通。因直通車只有利無害，對兩地股市都有好處，所以一定會開通。中國開始有期貨市場，相信會令股市更加波動。睇下個後市點玩法啦真係。