完美的一天

2008-01-19 日記

尋日難得mandy 唔洗補習，我們早左出去玩。我地約左兩點係天水圍等，去到咁遠係因為我地要去參觀濕地公園。兩點幾去到，以為會好多人買飛，點知一個人都無，一入去就買到飛，一成人一學生合共45蚊。平時對得電腦多，聽得嘈雜聲多，真係要去下大自然清靜下，聽下流水聲，聽下雀仔聲，睇下紅樹林，真係賞心樂事，係觀鳥屋入面，可以見到遠處既米埔同深圳。不過由於行得多，真係有少少累，返返去個主建築物，個度有間大家樂，歎左個tea，飲左杯紅豆冰，真係舒服。行到5 點鐘就要走，因為佢5 點收門。

宜家只係完左第一個節目，仲有下場。我地買左飛係嘉湖銀座睇6:25分既”末世凶煞”，呢套戲話以創新手法拍攝，都唔知咩意思，後尾睇落原來係以第一身手法拍攝，個鏡頭就係好似我地拎手提video camera 咁，震下震下。個戲係講成個城市突然發生爆炸，一瞬間天崩地裂，完全唔知發生咩事。主角同個camera man 不斷走難，所以個cam 會不斷搖黎搖去，後面個兩個師奶不斷問做完未，話睇到眼都花埋。無錯，呢個係呢種拍攝手法既缺點，另外佢都唔可以交代到前因後果，你就當自己係當事人一樣，唔知咩事係咁逃走。我就唔係太暈，因為我可以代入到個緊張場面。如果未睇過又想睇既，記住留意最尾個畫面，兩個主角傾計同影住個海個一度，佢會影住個海4-5 秒，水平線右手邊有野發生，佢比到hint 隻怪物點黎。總結如果大家唔怕暈，都可以去睇下呢套戲，我唔覺得好似人地所講既一套爛片。

睇完戲，去左隔離”嘉湖海逸酒店”食自助餐，book 左八點三，諗住睇戲睇到八點，點知七點九就出返黎，都唔緊要，早d 拎位早d 食囉。183 蚊位，唔可以expect 佢有d 咩食，但大至上生蠔呀，三文魚呀，呢d 實有既。D 熟食嘛嘛地，甜品都係嘛嘛地，cheese cake 無芝士味。我唔係食左好多野，但總算過下癮食下buffet 啦，為尋日畫上完美既句號。