復活節假期 2008

2008-03-21 日記

復活節假期既第一日，節錄mandy 既日記如下:

第二天一早8:30pm起床，真係好好好早啊，點解平日返工唔願起身，放假反而唔願訓呢？梳洗完畢後，發覺真係無事好做，又訓返落床。我咁樣又起身又訓返，已經整醒左陳Tim了。不過佢都估唔到我咁快就已經梳洗完畢呢(梳洗既定義係基本既刷牙洗面+進階既化妝執樣)！我地攤o係床上諗下今日有咩節目，不知不覺又好似遊魂咁有少少訓著。

9:30am的起心肝起身煮早餐，陳Tim話要o係D蛋上落D奶去炒，OKOK，陳大少，你要回味一下你既英國風味嗎？我地既早餐係：英式炒蛋﹑煙肉﹑火腿﹑多士﹑同埋牛奶，都幾飽架！

我奉旨唔執碗，梗係啦，煮又係我，洗又係我，如果連執都係我，我會情緒低落+躁狂發作。之後D碗係成個下午一直都未洗，比起最憎洗碗既陳Tim黎講，我都唔見得好想洗碗。早餐後就係睇桌球時間，再睇下電影，3:00pm就準備出街了，我地要去：食tea﹑買豬肉乾﹑IKEA﹑百佳。

自從自己都做緊小生意之後，發覺包裝同IMAGE係好重要的。去沙田第一城食TEA時發覺茶餐廳有好多要改進的地方。1. 鋪面無生意時員工竟然坐o係度睇雜誌。2. 員工唔清楚餐牌內的食物配搭，好似我問：意粉可否改米粉？員工竟然唔知道！我諗我唔會係第一個問呢個問題既客人掛？3. 食材扒類竟然隨意放o係鋪面的檯上。4. 我地食完埋單時，老闆竟然問我地：「你地食過D乜？」下？你地無落單架咩？我地係點住餐牌叫菜，我點記得D菜名？真係令人啼笑皆非！

之後我地去左IKEA，我要買裝茶葉既小玻璃樽。次次行IKEA，我同陳TIM都會討論下第時既屋企要點佈置，我既Style係要淺色系，白色﹑米色，淡啡色就very good，陳Tim就鐘意深色系，啡色﹑黑色佢就最岩，第時間屋......都唔知點match!!俾我搵到小玻璃樽裝茶葉喇 (其實人地係用黎裝鹽同糖)！又買左好靚既餐紙呀，深紫色既可以帶返公司用，四葉草既就屋企用啦！

行完IKEA都已經七點多，決定o係xx sandwitch(唔記得左個名)度食dinner，都唔錯架。期間陳Tim話要叫個湯，我問：「你點解要叫湯呀？你揀o個個無跟餐咩？已經有個湯喇喎！你食咩呀？」陳Tim答：「我食咩又關你事？」車，好叻咩，唔想俾人知你食咩，不如你過隔離檯坐丫！今餐要埋甜品都只係$139，好耐都無試過晚餐食得咁平了。

食完飯後有人話想返屋企睇太極，o個時都七點九，咁就快D去埋百佳啦。我地買左：火腿﹑蛋﹑粗身既腸(唔知係咩腸，竟然要$5x/6條)，雪糕，埋單二百幾，陳Tim用即享錢可以扣一半架，即係剩係俾半價，我地開心咁俾張信用卡收銀員去扣，點知佢話：「而家星展做緊promotion，可以全數扣哂呢！」即係我地一蚊都唔駛俾？嘩，好開心啦，抽住一袋二袋都唔駛俾錢，我諗當時o係我地兩個身邊經過既路人只會聽到我地不斷發出：「好抵呀！」「正呀！」「勁抵囉！」「咁著數！」等等既讚嘆聲，又多左兩個花師奶。

夜DD我又再睇桌球，今次係傅家俊VS丁俊輝。傅家俊真係唔講得笑，佢既氣定神閒+自信既氣度完全流露哂出黎，加埋佢打失波既扁咀CUTE樣，殺哂啊！11:30PM陳Tim o係SOFA訓著左，我叫佢入房「訓一陣」，我既「訓一陣」定義係一至兩個鐘。因為我地plan好夜晚要睇另一套VCD。到1:00AM我睇完哂傅家俊大戰丁俊輝之後，我入房叫陳TIM起身陪我睇VCD，點知佢唔願起身。喂！話明只可以訓一陣咋嘛！佢半夢半醒答：「訓覺呢D野邊有得訓一陣架姐？」嘩，陳生，你咁好命，好命到次次訓覺都可以大被蓋過頭一覺訓到天光？你既會考﹑A-LEVEL﹑甚至大學時候，都無試過只可以「訓一陣」？HOW BLISSFUL YOU ARE?!?!?!?!不過呢個都唔係MAIN POINT，MAIN POINT係，你訓還訓，讓返半張床位俾我可以嗎？